Metulak Panton NSA vs Etty

Poto. NSA

Nazar Shah Alam

Peuraho pawoh meulaboh malam
Jipeutron asam campli ngon lada
Kapijut tuboh meuhawoh badan
Sebab sang bintang jioh di mata


Peuraho pawoh meulaboh malam
Jipeuding asam campli ngon labu
Dak siminet troh gata po bintang
Teuga ju badan kapuleh rindu

Etty Joseberg Joseph


Peraho pawoh dalam geulumbang
Jiwoe oh malam keunoe u pante
Rindu lam hate sama ngon cut bang
Sang-sang di badan hana tuleng le

Si mirahpati dipoe oh malam
Beurujuk balam dipoe oh sinja
Rindu lam dada gram grum lam badan
Keunoe hai cut bang ta padu rasa

Nazar Shah Alam

Geulumbang raya jitampo kareung
Ka habeh sangsui bineh kuala
Kaleuh kupeutrok bak bandum ureung
Jangka lhe buleun lon jak cok gata

Meupakon pade meunan ka sangsui
Si angen uteun jipot tat teuga
Meuhan kujak cok lam wate kukheun
Nyawong lon buleun mungken ka hana

Etty Joseberg Joseph

Meukrue semangat e cut bang si gelumbang nyan
Jitampoe karang e sayang bicah bandum na
Lon takoet gata mameuh lam perkataan
Bak pembuktian e cutbang ciet sagai hana

Jangka lhe bulen ka takeun taba pinangan
September layang e cut bang ka habeh angka
Mubek keuh pade boh hate sangsui dalam blang
Janji buleun lapan e sayang jinoe goeh troh na

Meugah dipasie e cut bang jaloe ka karam
Geulumbang hantam e sayang ka bicah dua
Sa deungon dua e kanda ka troeh pinangan
Pat ciet hai cut bang sikarang seulangke gata?

Nazar Shah Alam

Teukeupak hate meusampe geulanteu tam-tum
Ka jitron ujeun hai buleun di Kuta Daya
Haba bak kanda boh hate kon sagai bak keun
Kaleuh bang hitung po buleun katroh bak masa

Bang tak takok pon bungong rom buleun sikureung
Leuh nyan bang undur cut meugleung sibuleun jangka
Keundak bak Rabbon Ilahon hana pat bang keun
Bala meulinteung ban kareung bak jalan kanda

Menyum tat masen e canden sira di Bireun
Sira nyan geukeun putroe keun seubeutoi rasa
Meuka kugaseh boh hate sidro-droe ureung
Jantong ngon tuleung e bayeun bang tem plah dua

Etty Joseberg Joseph

Jak Tapak Tuan e cut bang bak buket naga
Ngoen sirup pala e kanda ta jeuhak sigoe
Haba ban haba bak adoe peujeulah punca
Mubek di dara e kanda tuha bak preh droe

Ujeun diteuka e kanda trep-trep sigoe
Meugah lam nanggroe si mawoe dalam meurana
Han ku teum di lon e rihon ka kuduek sidroe
Oh hate rangoe sigo-go hawa meusenda

Nazar Shah Alam
Ile krung baru e meulu lam laot Tuhan
Ie krung seumanyam e intan jiplah kuala
Bang lake meu’ah boh hate bak gata badan
Karoh bang tahan e sayang hajat meudua

Allahai angen di timu kapot beurijang
Peuraho tongkang ka tho krang nak wo u daya
Eya Tuhanku Ilahu neutakdir badan
Beu ek meusajan lon tuan ngon gaseh hamba

Si bintang timu Allahu teubit leupah trang
Jiteuka awan e sayang teuhalang cahya
Beubagah laju Tuhanku neubri langkahan
Han ek le badan ya Tuhan lon preh adinda

Etty Joseberg Joseph
Ie krueng manggeng meugah meupuseng wahe e cut bang
Di dalam krueng nyan saboeh jaman gadoeh encien
Jinoe saket dalam ki-ing oh lon ngieng wahe cut bang
Habeuh dum rakan ateuh jalan puduek peulamien

Gopnyan than lebeh ulon than kureung wate lon ngieng
Mata ngon boh mieng oh gop ngieng lage India
Dak medeh ulon awai dile duek meusandieng
Keudeh u Kuta Bak Drien ureung meuramien jak pesta

Allah hu Tuhan angen malam cukop masam oh dirawien
Jie tueka dingin bak pucok mulieng angen subra
Muenyoe gaseh peulareh rijang ateuh peulamien
Bek sabe meungieng-ngieng atra gop ba

Nazar Shah Alam
Jitimoh ceuding hai euncin musem luwah blang
Paso lam reugam hai intan puwo u kuta
Na cit abang nging Lahmudin rakan meu’en bang
Ka dua malam di gobnyan arong bahtera

Dijih tan kaya e dinda hana cit tampan
Nyoe meudong sajan ngon cutbang jioh tat beda
Jih sang afrika peunawa bang bak salman khan
Tapi jih awai e sayang duk sanding dua

Meuhoka bade Tuhan lon neukirem rijang
Hawa kulayang ya Rahman bak sidro dinda
Han ek le kupreh meusaheh troh tiga bulan
Bah eunteuk malam buleun trang lon lamar gata

Nyoe ka bang lamar po bintang gata di Manggeng
Hana le bang tem simusem meujak preh gata
Eunteuk malam troh peunganjo keudeh u manggeng
Singoh beutatem ming licen bang puwo sigra

Cukop nam detik bungong pik mat jaro malem
Alek tapateng e canden siuro saja
Peunteng cut putro gaseh droe jadeh duk sandeng
Si puteh licen di Manggeng peu kulah kama

Simeulu kaye meuade jipalet bak tring
Seulala tanging bungong drien ka saket mata
Nyoe katroh hajat kupuwo u Kuta Bak Drien
Gata kupeuding mirah ming bak putroe raja

Dari Rawa ke Entah, 31 Oktober 2012