Lam saboeh kisah

Panton bak awai thon 2014 dari Syeh Fuady

Fuady Bin Syukri Sulaiman

Assalamualaikom warah matullah
Thon 2014 jinoe ka teuka
Ta lakee doa ka Nibak Allah
Beuglah keuh langkah sabe lam bahagia

Kiban lawet nyoe adoe meutuwah
Katrep hana bhah geutanyoe dua
Canek lam panton hana ngen balah
Lagee kabeh dah panyet tan sua

Lam ujeun malam angen ji meushah
Sang-sang jipeugah saboh calitra
Sampoe lon teukhem dalam peuratah
Wate ta peugah meuturi dua

Tanyoe meu panton peu gadeh sosah
Bak thon ka leupah ceudah lagoina
Teuma oeh lheuh nyan tinggai keuh langkah
Sungue ta peugah di dalam dada


Beuthat lage nyan adoe meutuwah
Han lon peu ilah jarak ngen dinda
Lon ingat sabe beuthat beu jioh
Doa lon peutroh sabe keu gata…

Etty Rismanita


Walaikumsalam warahmatullah
Lon samboet bagah salem di kanda
Lam malam jula salem ta keubah
Cukop that gundah watee ta kira

Meusabab bajoe peunerah patah
Sinan dikeubah lam guloeng tika
Haba dijioeh neu putroeh sipatah
Peutanda langkah dilee masa na

Terimoeng geunaseh cut bang metuwah
Ka neuthem keubah saboeh haba
Saboeh cerita neu ungket lom surah
Kisah lon kebah han lon bie lupa

Ta ka lon laot leupah that luah
Gelumbang bicah sigoe-goe na
Lewat pantoennyoe lon cie si patah
Tanda lon keubah cut bang lam dada

Fuady

Seunang that hatee cukop that leupah
watee neu balah haba bak dinda
ibarat ticem oeh beungoh ceudah
di meusu brah-brah di cong bak sala

teurimong geunaseh adoe meutuwah
rayeuk that tuwah ulon keu gata
jadeh han teungeut nibak malam nyoe
tingat keu adoe lam bahagia

hujeun ka di toh bumoe ka dirah
bungong yang ceudah han jadeh mala
beumudah raseuki neubri le Allah
hoe-hoe yang leupah Tuhan peulara

han peu ulon brie harta lon han glah
hamba nyoe laeh syiet hana daya
neutueng panton nyoe keu bungong keumbe
laju ta sube di dalam dada 
 
Etty

Meukrue semangat malam ka crah
bintang sang ka bicah u lam dada
Bahlee dilua malam ujeun rah
hanjet keu sosah leupie diteuka

nibak malamnyoe panton that indah
aret meusurah ngon sue biola
adak kon malam ngat ta peu tuntah
sampe beu rebah bulen purnama

Bungoeng kembe lon sale bagah
bengoh ulon rah ngat bek mala
oh sepot uroe u dalam lon keubah
han lon bie patah adak on tuha

E ya Rabbi e ya Allah
neubie ilah dalam meusapa
beumangat asoe beu lanca darah
beujeut meubalah singoh ngon lusa 

Fuady

Seugala pujoe puwoe keu Allah
ateuh iradah han soe ek kira
haba bak adek mameh sileupah
lage ie U Mirah meushap lam dada

langet oeh supot di tubiet mirah
kuneng meuhah-hah sang-sang ban saga
gaseh lam hate meubek keuh bukah
ta tampai bagah layeu bahtera

umpama kapai lam laot luwah
layeu beuget pah oeh angen peudoda
mangat bek di plueng ka sigoe sahoe
beutroh tanyoe woe blah deh kuala

meunan keuh tamse bungong si ulah
bek salah langkah ka salah raba
ta preh cut abang jak peutoe langkah
bah lon peusiblah bungong lam dada

lon lake meuah meunyoe na salah
dinda meutuwah bek beungeh meu ube sira
beuluwah hate beurayeuk tuwah
beu ek tabalah singoh ngen lusa... 

Etty

Hoeka malam trep that bicah
Lam hapoeh hapah hate ngon jiwa
Ta balek uneun, wie pih han pah
Dak juet beu bagah malam beu faja

Lon kaloen bulen pih than leumah
Lon luem bagah roet lungkiek kaca
Hoeka raja si bintang indah
Beutroeh keuh leumah oh wate faja

Sijuek lam hate senang meulempah
Oh uroe beukah lemah di kanda
Nibak beranda haba lom tabalah
Kereuja ta keubah tasapa dinda

Terimoeng geunaseh gaseh meulepah
Layee ka beukah neu pasang ija
Saboeh bahtera ka teudoeng meugah
Pucoek meusilah ujoeng Abdya

Labuhan Haji pelabuhan indah
sinan disinggah kapai raya
hana nyang dosa kiban peumeuah
hana nyang salah dalam meusapa

lon harap perahoe layee teuhah
beutroeh ta singgah u dermaga
lon harap hatee sabee lam cidah
meuligoe ta papah dalam seumapa 

Fuady

Meubek na ragu meubek na gundah
Ka cut bang kubah si layeu ija
pajan peureule bah cut bang peuhah
pokok jih langkah beutroh banpinta...hahha

yang peunteng cut dek bek susah-susah
peugah beu bagah laju bak kanda
panton ngen lagu ka cut bang kubah
teunte lon seurah keu gata dinda

mangat jeut gadeh si mandum susah
bek le meukubah di atma jiwa
ka cut bang peuget mandum ngen ikhlah
mangat bek resah lam hate dinda

beurumeh sabe ka nibak wajah
ban bungong ceudah keumang oeh faja
beumeube harom hate ngen lidah
bungong yang ceudah bek mala-mala

saba beurayeuk ingat Keu Allah
hudep yang susah bek that takira
singeh oeh dudoe meugantoe lupah
tuhan bri upah soe-soe yang saba.. 

Terimoenggeunaseh
Banda Aceh, 02 Januari 2014