 |
| NZA |
sumber: grup Sastra Aceh facebook, 26-27 Maret 2012
Syeh Manggeng
Assalamualaikom hai tengku jampok
Pat taduk jinoe digata?
Nibak malamnyoe ulon that suntok
Ku preh-preh troek lawan meucakra
Soe nyang beuhe jaroe neutunjoek
Jet lon peurabok jeut-jeut anggota
Taba laju senjata keuno beu-ok
Beuthat pih rayek hanjet keumara
Beuthat pih AK keuno tatarok
Hanjet ke reudok masam ngon muka
Munyoe gata sep sigoe geu reu,ek
Laju meutumpok hana meudaya
Kasep keuh dile haba lon tawoek
Jino lon preh trok yg beuhe haba
Menyoe than tenaga sagai bek troek
Nyang batok-batok jeut neu iem saja
balasan: Syeh Pengko
Lon sambong layeu mawoe di pucok
lon ci jak antok haba meuhaba
dari dalam glee keuno lon katrok
nyoe Tuan Jampok si lagak rupa
Etty meutuwah lon sinde be-ok
tapi bak budok han trok ban jiwa
bungong yang puteh pakat meupakok
glie bulee kudok iram bulee pha
Nyo pakat pakee dek Etty tawok
bit hatee hantroh ulon tat iba
han mungken Etty bang peugah brok-brok
hanjeut bang antok haba peusuna
Layeu keureutah ka geu geureutok
Geubalah pakok haba digata
yoh goh meudawa bang tanyong be-ok
pat jiduk pucok gampong digata
Gampong tan ikue han meupu antok
gampong tan pucok han item jaya
keu ikue gampong laot Tuhan jok
Nyang geukeun pucok cit rimba raya
nyo saboh gampong hana meupucok
lee ureung budok atawa janda
man gampong gata wahee adek euk
ci mita pucok peuna lam rimba
Balasan: Syeh Manggeng
Wahe e cut bang layang dalam lhok
Haba ta taroek cukop meumada
Mubek neutanya iku ngon pucoek
Disinan rayek gata kakanda
Di Barat Daya Jalan u beuok
Keudeh di peutrok ujoeng selatan
Di sebelah kanan rimba meujampoek
Laot Tuhan jok meugruem geulumbang
Oh wate malam leupie lam kudoek
Inan wate troek angen di rimba
Oh wate sinja payah lop lam ploek
Inan wate troek angen di laot raya
Wahe kanda meuah lon tawoek
Haba lon peutroek peujelah berita
Hana nyang janda peulom meubudoek
Allah Tuhan jok lagak lam rupa
Budi bahasa jeut neu peuantoek
hanjeut meurabok hate lam dada
Nyoe than peucaya sila neupeutroek
Bek neutawoek dari pucok rimba
Balasan: Syeh Pengko
Meutuwah bungong harom meukeubok
Meutuwah meurbok lagak suara
meutuwah Etty bungong di pucok
bang Pengko katrok peusambang haba
Tanoh abdya memang na pucok
wahe adoe ek iku jih pih na
Hjat bang tanyong bak adek beu-ok
peuteunte dek ek kibak digata
oh ka di banda tuwo ceurucok
oh ka dalam plok tuwo dilua
nanggroe abdya bagi bang jampok
nanggroe ulon trok kaleuh kugamba
kupeudong gampong bak ateuh koran
hana lon seugan tuleh abdya
teuma digata hai bungong mayam
peukeuh bak koran taba abdya?
bang kalon buleun jiteubit malam
Rindu tat badan akan abdya
bang deungo etty lam penulisan
inan kuh awai meutatap mata
meutapi pakon adoe lon tuan
dalam tulesan hana abdya
tapeugah gata di sideh tinggai
pat pembuktian gata adinda
ta ba nan gampong kon wayang-wayang
lage ta lhat nan di dalam peta
gata bungong rom lam penulisan
leubeh bangga nan selatan neuba
memang bandua na roh kaitan
tapi nyataan nanggroe nyan beda
bek le tajak pluk nanggroe sigupai
sebab lon tuan ka meupat punca
Dari phon nek ku dari phon neknyang
ban bandum inan lahe binasa
gata cit mungken dara selatan
tanoh sigupai kon asai gata
sikuntom bungong teuduk bak karang
jampang bak jampang lon pot keu dara
yoh goh tatuleh tentang sigupai
bek jak peugah nan aneuk abdya
gata dek etty dara rupawan
jino tulesan kajeut beusigra
meunyo goh lom na saboh tulesan
keubit tat sayang gata o marra
Balasan: Syeh Manggeng
Alahai bang ek adun di badan
Bukon maksud tuan peugadoeh Abdya
Bak urusan menuleh lon hana jagoan
Bak penulisan mantoeng le meutuka
Yoeh wate jamen pon penulisan
Goehlom that faham masalah nama
Sebab nyan phon karya lon tuan
Dimuat bak Koran hana teusangka
Neuk kirem Cuma keu gura-guraan
Raseki lon tuan teubiet meudia
Cut bang pih peugah nibak watenyan
Nyoe tulesan goh jet di keu lua
Neusaba hai bang teungoh lon karang
Saboh tulesan teungoh lon rangka
Sebab lon peumula susah hana ban
Kon lage cut bang ciet ka juara
Le that karya teubiet lam Koran
Peng jutawan roet nan di teuka
Teuma di ulon nyang keuh baroenyan
Bek keuh neupeusaban lage di gata
Pasi Lhok Pawoh tujoeh geulumbang
Pasi lon tuan meutabue kareeng
Nanggroe Abdya teumpat lahe lon tuan
Bak bineh geulumbang pasi Ujoeng Manggeng
Sampoe pih sampoe adak pih pajan
Dalam ingatan sabe teupeuna
Jaya ngon hana teutap lon sayang
Nibak saboeh akan haroem nama
Neumat hai bang janji lon tuan
Nyoe umu panyang kanda bek ragu
Nyan Abdya akan tamajukan
Dum penulisan dari sinan meucuhue
Balasan: Syeh Pengko
Adoe meutuwah sitanglong badan
boh hatee cutbang si tari mata
kon maksud hatee sampe lage nyan
bak penulisan jioh ka taba
Nyo ka tamanoe adoe lon tuan
beubasah badan beubasah muka
donya teumuleh gata ka jalan
tinggai tamah nan ubak media
kon masalah mit dan lee tulesan
nyoe masalah nan nanggroe tateuka
adak meuribe peugot karangan
hana meusikhan peumaju bangsa
hana meusaboh naggroe takarang
keupu tulesan meuribe laksa
kon tentang kayem media jok ruang
masalah amatan naggroe digata
Sejak phon turi han teujalok bang
bungong rupawan sigampong teuka
bang peugah bak gob aneuk selatan
sebab rupawan meunan tarika
Untong meusambong talo ikatan
nibak saboh jan ka saboh kama
ka saboh tempat asah tulesan
ka saboh badan ka sama warna
sempat trep bacut bang turi keumang
kadang-bak kadang ka laen hila
kadang roh galak keugata sayang
roh tik rayuan cutbang keugata
rupajih adoe aneuk sigupai
tari kon wayang adek di kanda
bak pike-pike cok keputusan
bah gata mawar jeut keu syedara
nyoe pesan kanda keugata adoe
peumaju naggroe asai tateuka
peubeudoh nan dalam tulesan
bek na raguan tuleh abdya
0 komentar:
Posting Komentar