Kawen Paksa (Meubalah Panton Aceh)

Geutuleh le Etty Rismanita, Nazar Shah Alam, dan Muhammad Ali

 Etty Rismanita

Salamualaikom e sigom wareh
Hana ta tuleh keu kawen paksa
Sidroe pemuda geuthem meu abeh
Demi peulareh disinyak dara

Dalam cerana ranup seulaseh
Gapu geutindeh keu cukop atra
Meukawen paksa cukop meupaleh
Hate lam seudeh siumu masa

Han tenang geuduk han tenang geu-eh
Seubab peulareh hana dihawa
Keupu bak meja sedia ngon ileh
Meunyoe meucureh hate ngon dada

Wahe pemuda nyang ka meuabeh
Tabie seumileh keu aneuk dara
Mubek tapaksa rasa sigadeh
Hareuta habeh han bahagia

 Nazar Shah Alam

Geulima rampak timoh to binteh
Geulima payeh timoh to paya
sigeunap uroe han kuteumuleh
jareung lon peugleh asoe grup sastra

Meuseubab langet beungoh puteh gleh
hana roh lon eh peu-ubat mata
meuseubab haba pah tat bak binteh
siat hai wareh lon ci tik jala

Leupah harom si jeumpa puteh
Meugareh-gareh kuneng meukama
aneuk muda paksa si gadeh
cukop paleh hate jih hana

Meunyo bang Pengko si agam blah jeh
Lon sambong gateh laen kumita
Seubab ‘oh lahe kaleuh geu-ureh
puteh bak puteh sukla bak sukla

Nyoe sidroe dara adak puteh gleh
keu-ing ngon beuteh sang putroe raja
hana bang pungo paksa meugaseh
sigo bang gareh meunan peudaya

Sigoe jitulak geulumbang paleh
beujipeugaseh han le kugisa
pada dara jroh lam hatee peudeh
get keuh hai wareh laen tik jala

Agam geupeuget mata peut gareh
lam jeut-jeut tuleh na saboh donya
inong, rumoh dro, donya, ngon lapeh
meunan kupeugleh nyak sangkih haba

Jitik le inong, rumoh droe pileh
Jitulak gaseh, luah tat donya
donya Geupeujeut meulapeh-lapeh
meunan keuh wareh tamse si dara


Etty Rismanita

Meukrue semangat pukat lam buweh
Kadra ngon bileh jioh meurasa
Sidroe-droe nyata siagam blah deh
Hana lon tuleh haba peusuna

Menyoe than reudok di langet puteh
Han mungken wareh ujeun jiteuka
Menyoe bak gata han payah peungaseh
Dari blahdeh jeh kusuroet sigra

Keu kawen paksa bacut tatuleh
Adak ka canggeh jameun nyoe masa
Meunyan budaya mantong cit lareh
Cukop that peudeh oh ‘te takira

Memang dilanget meulapeh-lapeh
Taboeh nyan tambeh keu aneuk dara
Gohlom tarasa wahe nyak wareh
Taek bak binteh oh te ka cinta

 Muhammad Ali

Salamu’alaikum saleum dek puteh
geu hoi lon wareh han geu hoi nama
watee teu baca hate ka teukreh
adat bak meudeh ta peugah cinta

soai meukawen han pileh-pileh
bah kureung silapeh harus teurima
hudep di donya beu lee tagaseh
nyang meuhoi wareh geu yu agama

di adun Nazar carong teu muleh
meu tamah beureuseh geususon kata
kayem ta baca yang gobnyan tuleh
jehpat di sideh bak koran Prohaba

Nazar Shah Alam
Hahahhaha

Wahe seulanga adek puteh gleh
e jeumpa puteh boh hatee kanda
Sipat bang ayon keunong le gareh
Sigo bang tuleh sang salah makna

Aleh mata bang ka boh leuk lapeh
seubab seulaseh bang teungeut hana
Bek keuh teusinggong mawo tuah gleh
meulu peungaseh meubida makna

Maksud bang peugah e bintang blahjeh
paksa meugaseh nyan but cilaka
agam yang paksa akai jih paleh
sayang tat puteh dara hatee ma

Maka bang Pengko peugah silapeh
tan pih sigareh meunan bang suka
nyo naksu seunang gaseh meugaseh
cok keuh yang gleh-gleh nyang saleng cinta

meunan pandangan cutbang teumuleh
perkara gaseh di dalam dada
bang lake meu’ah kadang meulanggeh
e jeumpa puteh kadang na cupa

Muhammad Ali saleum hai wareh
nyoe lon teumuleh keu mangat haba
hana tat caroeng cit lon teumuleh
bek tat tapateh keu gura-gura

Kon bak Prohaba seureng teumuleh
tapi hai wareh Serambi nama
kon lon meusombong meunan kugareh
sekedar wareh peuteupat haba

Etty Rismanita

hahaha,

Aleh oe meunan alehnyoe meudeh
Ban ka meugareh meunan lam dada
Meuah hai cutbang faham meuseliseh
Salah bak tuleh atau bak baca

Seubab neupeugah sinan bak bareh
Adak dipengaseh han le bang gisa
Bacut teuk haba lon bie peulareh
Han soe puengaseh keu ubak kanda

Nazar Shah Alam
Hahhaha

Seulayang tunang lam miga puteh
Bak pateng bareh teuduk panglima
Lage tapeugah hana meulanggeh
Tan so peungaseh ka ubak kanda


Pane na campli pula bak binteh
Pat mungkin gareh cureh teulaga
Pane ruman bang jiboh peungaseh
Jioh meulanggeh nyoe meunan nyata

Tapi nyang kaleuh sep jeut peunuleh
Lage bang gareh hana meutuka
Aleh keuh bak peu ji eu sigadeh
Yoh goh bang gaseh mantong meuputa

Hana jiweh-weh pungoe sigadeh
Padahai gadeh tan bang peumantra
Ka meunan jadi keundak teugareh
Meunan puteh gleh inong keu kanda